ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាថ្លែងថា កម្ពុជាអាចរៀបចំស៊ីហ្គេមនៅឆ្នាំ២០២៣ នេះគឺជាគុណបំណាច់របស់ព្រះករុណាព្រះបរមរតនកោដ្ឋ សម្ដេចព្រះ នរោត្ដម សីហនុ ដែលបានចាប់ផ្ដើមរៀបចំប្រកួតជាលក្ខណៈអន្តរជាតិជាលើកដំបូងនៅកម្ពុជា នោះគឺព្រឹត្តិការណ៍កីឡា GANEFO នាឆ្នាំ១៩៦៦។
សម្តេចតេជោថ្លែងដូចនេះក្នុងពិធីជួបជុំពិសារអាហារជាមួយកីឡាករ និងកីឡាការិនី នៅល្ងាចថ្ងៃទី៣ ខែមេសា ឆ្នាំ២០២៣នេះ។
សម្តេចតេជោមានប្រសាសន៍ថា៖ «ខ្ញុំគួរតែបញ្ជាក់នៅកម្មវិធីនេះបន្តិចថា យើងរៀបចំបានស៊ីហ្គេមនៅឆ្នាំ២០២៣នេះ យើងគប្បីនឹកឃើញទៅដល់គុណូបការៈដ៏ថ្លៃថ្លារបស់ព្រះករុណាអតីតព្រះមហាក្សត្រ ព្រះប្រមុខរដ្ឋនាពេលនោះ ដែលព្រះអង្គបានខិតខំកសាងនូវមូលដ្ឋាននៃពហុកីឡាដ្ឋានជាតិអូឡាំពិកដែលពេកនោះសម្រាប់ការធ្វើ GANEFO»។
សម្តេចបានបញ្ចាក់បន្ថែមទៀតថា បើទោះបីជាកម្ពុជាបានឆ្លងកាត់សង្គ្រាមការបែកបាក់ ដោយវិនាសកម្មក្នុងរបប ប៉ុល ពត យ៉ាងណាក្តី ក៏ស្តាតអូឡាំពិកនៅតែជាមូលដ្ឋានដ៏ល្អមួយសម្រាប់ផ្តល់ឱ្យកម្ពុជាធ្វើការប្រកួតនៅឆ្នាំ២០២៣នេះ ដែលត្រូវនឹកឃើញពាក្យថា «ផឹកទឹកឱ្យនឹកដល់ប្រភព ទទួលទានផ្លែឈើត្រូវនឹកដល់អ្នកដាំដើម»៕
